İşğal etilgen Aqyarda Rusiye quvetçileri refiqler Oleg ve Natalyanı hırsızlağan, 9 yaşındaki balasını ise sığınaqqa alıp kettken. Bunı Qırımtatar resurs merkeziniñ başı Eskender Bariyev bildirdi.
"Ana-babanı alıp ketip, balanı öksüz qaldırmaq bu cevap bermek kerek olğan bir vaqiadır. Aile ve yaqınları şaşmaladılar, tuvğanları qayda, sağmı, ne sebepten apiske alındılar ve ne ile qabaatlanalar, bilmeyler. Aynı zamanda, olar balanıñ yetimhanege tüşkenine şaştılar", — dep qayd etti o.
Malüm olğanı kibi, çeçek ayınıñ 9-nda Natalya balasını Aqyar mektebine ketirgen. Ekinci dersten soñ oquv yurtunıñ müdirine telefon etkenler ve "ana-babası kelmeycek, balanı ise polis hadimi alacaq" dep haber etkenler.
Aynı şu künü Alupkada, Oleg anda iş ziyaretinen edi, onı sekiz FSB hadimi tutqan. O çalışqan şirketniñ müdiri, Oleg "siyasiy madde" boyunca yaqalandı, dep haber alğan.
Natalya ve Olegniñ telefonları cevap bermey, lâkin ara-sıra aqşamları onlayn peyda ola.
"Tutulğanlarnıñ balası ne yaşadı, tasavur etmek bile qorqunç. "Meni mından ne vaqıt alıp ketecekler? Ne vaqıt evge qaytacağım? Anam ve babam qayda ve men ne içün mındam?" kibi suallerge "bir şey bilmeyler ya da ana-baba statusı belgilenmegence eñ az 6 ay devamında anda qalacaqsıñ" dep cevap bereler... ve başqa bir şey aytmaylar", — dep ikâye etti Bariyev.
Bu tek bir vaqia degil. Quralaynıñ soñunda ukrayin ombudsmanı Dmıtro Lubinets, Aqyarda Rusiye Federal havfsızlıq hızmetiniñ hadimleri olaraq tanığan insanlar Ukrayina vatandaşı Sergey Grışçenkovnı hırsızlap, belli olmağan yerge alıp kettiler, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
