Ukrayina akimiyeti Rusiye tarafınen er türlü formatta körüşüvlerge azır, dep bildirdi. Rusiye Federatsiyası eñ yaqın vaqıtta Rusiye ve Ukrayina arasında muzakerelerniñ nevbetteki turınıñ kününi aytmağa söz bere. ABD Ukrayinanıñ barışıq añlaşması talaplarını aldı ve Rusiyeden de aynısını bekley, dep bildirdi. Kütleviy haber vastaları Amerika prezidentiniñ sabrı bite, dep yaza. O, Rusiye lideri Vladimir Putin «ateşnen oynay», dep bildirdi.
Ukrayina tarafı Rusiye tarafınen er türlü körüşüvlerge azır, üç taraflı formatta liderler seviyesinde de muzakerelerge azır, dep bildirdi Ukrayina prezidenti Volodımır Zelenskıy.
Biz Vatikan, İsviçre ya da qayda teklif etseler tehnik körüşüvge azırmızVolodımır Zelenskıy
«Biz Vatikan, İsviçre ya da qayda teklif etseler tehnik körüşüvge azırmız. Biz liderler seviyesinde de körüşüvge azırmız. Qararımız tehnik körüşüvsiz birden liderler seviyesinde muzakere etile bile – biz tehnik körüşüvsiz liderler seviyesinde körüşmege azırmız. Putinge eki taraflı körüşüv kelişmese, ya da er kes üç taraflı körüşüv istese, men razım. Men er angi formatta azırım», – dedi o.
Körüşüv telükesizlik kefaletlerinen bağlı olsa, o, AB vekilleri olsun, dep ister edi, dep qayd etti Zelenskıy.
Rusiye Tış işler naziri Sergey Lavrov ise Rusiye ve Ukrayina arasında doğru muzakerelerniñ nevbetteki kününi eñ yaqın vaqıtta ilân etmege vade etken edi.
ABD prezidenti Donald Trump, mayısnıñ 26-nda Rusiye üç yıldan ziyade devam etken cenk vaqtında Ukrayinağa qarşı eñ büyük ava ücüminiñ üç künlik bombardımanını bitirgen soñ, Kreml lideri Vladimir Putinni kene tenqit etip başladı.
«Vladimir Putin şunı añlamay, men olmasam, Rusiye artıq deşetli şeylerge oğrar edi. Ve men – KERÇEKTEN DEŞETLİ şeylerni aytam. Ateşnen oynay!», – dep yazdı salı künü Trump Truth Social içtimaiy ağında.
Trumpqa Rusiye resmiy şahıslarından tek Rusiye Telükesizlik şurasınıñ reis muavini, sabıq prezident Dmitriy Medvedev cevap berdi.
«Trumpnıñ Putin «ateşnen oynay» ve «yaramay şeyler kerçekten» Rusiyenen ola degen laflarını aytsaq, men kerçekten tek bir yaramay şeyni bilem – üçünci cian cenkini. Ümüt etem ki, Trump bunı añlay!», – dep yazdı o, X içtimaiy ağında.
Bu beyanatnı Donald Trumpnıñ mahsus vekili, Rusiye ve ABD muzakereleriniñ iştirakçisi, Keith Kellogg izaatladı. O, Medvedevge X içtimaiy ağında cevap berdi: «Üçünci cian cenkinden evel qorqu saçıluvı – Dmitriy Medvedevniñ dünya devletine uyğun olmağan muvafaqiyetsiz, tüşüncesiz izaatı. Prezident Trump bu cenkni ve öldürüvlerni toqtatmaq içün çalışa. Washington Moskvadan bir afta evelsi vade etken memorandumlarını bekley. Ateşni toqtatıñız».
Politiko neşiri yazğanına köre, Trumpnıñ Putinge qarşı sabrı bite, amma nevbetteki adımlarını daa bilmey. «Putin Trumpnıñ oña qurğan altın köpürni yaqmaqtan telükeli yaqınlıqta buluna», – dep ayttı neşirge Amerika memuriyetiniñ hadimlerinden biri gizli qalmaq şartınen. Aynı vaqıtta, Devlet departamenti Trumpnıñ sözlerini Putinden közü qaytqanı kibi tüşünmege kerekmey.
Putin cenkni toqtatmağa istemese, bütün barıştırıcı ğayretler boş olacaqLindsey Graham
Rusiyeniñ iqtisadiy ortaqları içün alımnıñ 500%-ını belgilegen Rusiyege qarşı sanktsiyalar paketini azırlağan Amerika senatorı Lindsey Graham Putin cenkni toqtatmağa istemese, bütün barıştırıcı ğayretler boş olacaq.
Keith Kellogg Fox News içün bergen intervyüsında Trumpnıñ memuriyeti «rusiyelilerni muzakere masasına oturmağa mecbur etmek içün toqtamayıp basqı yapmaq kerek», dep bildirgenini RFE/RL hatırlata. Kellogg barışıq esnası quvandırmasa bile, Trump «öyle de devam etmek» kerek, dep qoştı. O, Ukrayinadan barışıq añlaşmasınen bağlı talaplar aldı ve Rusiyeden aynısını bekley, dep ayttı.
Washingtonnıñ barıştırıcı teşebbüsi neticesiz oldı, ve bu cenkniñ deñişüv devri oldı, dep tüşüne siyasetşınas Aleksandr Morozov.
Putin Trumpnıñ tekliflerinden iç olmağanda bazılarına razı olsa, Trump bu körüşüv içün ola bileAleksandr Morozov
«Donald Trump ve memuriyeti bu dört aynıñ neticesini çıqara, diger taraftan ise, Avropada yapılğan muzakerelerde bir kelecek olğanını tüşüngenler yoq, – dep ayta o. – Ve, ebet, Kreml uzlaşuvını talap etkeni içün muzakerelerde er angi uzlaşuvğa razı olmadı, ve şunıñ içün Washington köstergen barıştırıcı teşebbüsiniñ bütün imkânları sarf etildi. Moskva yapqan raketa ateşleri Putinniñ talaplarına uyğun niyetlerini pek yahşı köstere. Bu ya da-yada ola: yani ya Rusiye yeñile, ya da Ukrayina».
Vladimir Putin teklif etken Ukrayina, Rusiye ve ABD iştirakinen üç taraflı körüşüvni aytsaq, siyasetşınas kerçekleşeceginden şübhelene.
«Belli ki, Putin Trumpnıñ tekliflerinden iç olmağanda bazılarına razı olsa, Trump bu körüşüv içün ola bile. Olmasa, sammit ne aqta?», – dep ayta Aleksandr Morozov.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.AqiqatnıñTelegram ve İnstagram saifelerinden taqip etiñiz.
