Qırımda qırımtatar milliy areketiniñ veteranı Ayşe Seitmuratova vefat etti. Bu aqta Qırımtatar Milliy Meclisiniñ reisi Refat Çubarov haber etti.
«Rusiye işğal etken Qırımdan kene kederli haber keldi, inanmağa istemeysiñ, – 89 yaşında efsaneviy dissident, Sovetler Birligi zamanlarınıñ siyasiy mabüsi, jurnalist, tarihçı, qırımtatar milliy areketiniñ veteranı Ayşe Seitmuratova vefat etti», – dep yazdı o.
Çubarovnıñ aytqanına köre, cenaze yeri ve vaqtı haber etilecek.
Ayşe Seitmuratova qırımtatar milliy areketine 1964 senesi qoşuldı. Bundan bir yıl evesi Samarqand universitetinde tarih fakültetini bitirip çalışıp başladı. İlk sefer Seitmuratova 1966 senesi oktâbr ayında «Milliy nefret doğuruvı» maddesine istinaden apiske alındı. Onı Moskvadaki Lefortovo SİZOsına qapatqan ediler. Soñra qapalı şekilde mahkeme oturışuvı oldı. Anda Ayne Seitmuratovanıñ ükmü çıqarıldı: şartlı olaraq üç yıl apis cezası.
Seitmuratovanıñ birinci ve ekinci apis cezası arasında tahminen dört yıl keçti. Ekinci kere onı Özbekistanda apiske alıp, cemaat-devlet qurumına iftira atqanında qabaatladılar ve üç yıl koloniyada qalmasına üküm ettiler.
1978 senesi Seitmuratova ABDge köçti. Onıñ aytqanına köre, mecburiy psihiatrik tedaviylevge oğratılacağından qorqqan edi.
Soñki yılları Ayşe Seitmuratova işğal etilgen Qırımda yaşadı. ABD vatandaşı olğanı içün oturuv izni 2025 senesine qadar berilgen edi.
Qırımtatar milliy areketiniñ veteranı keçmişte Azatlıq Radiosı, BBC, DW, «Amerikanıñ sesi» hadimidir.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
